Menu
L’istorgia da la scola da Trin cumenza en il 19avel tschientaner. Da quel temp han ins installà trais scolas communalas che vegnivan manadas da mintgamai ina persuna d’instrucziun. L’instrucziun aveva lieu en stanzas pitschnas e sa drizzava tenor il dumber dals uffants en il vitg. Durant l’enviern, da l’october fin l’avrigl, gievan ils uffants a scola. La stad stuevan els gidar en ils manaschis dals geniturs u insanua auter. Cun excepziun da Nadal e Bumaun na devi naginas vacanzas.
L’onn 1875 han ins construì ina chasa da scola nova, perquai ch’ils edifizis da scola existents n’han betg pli gì plaz avunda. Finanzià la chasa da scola han ins cun vender laina dal guaud Ransun. La chasa da scola nova valeva da quel temp sco la pli bella en l’entir chantun. Ella ha pussibilità da manar duas scolas e da porscher meglras cundiziuns a las scolaras ed als scolars.
En il decurs dals onns han ins renovà pliras giadas la chasa da scola. L’onn 1958 hai dà ina renovaziun extendida, cun la quala ins ha installà in stgaudament central. Ulteriuras renovaziuns han tranter auter pertutgà il bajetg da pumpiers che vegniva duvrà sco local da pumpiers e per l’instrucziun manuala.
Il 1974 han ins construì la halla da gimnastica e schlargià il sistem da stgaudar cun installar in stgaudament d’ieli. L’abitaziun dal pedel han ins transfurmà ils onns 1970 en in’ulteriura stanza da scola. Per stgaffir dapli plaz per adina dapli scolaras e scolars han ins pli tard spustà ils biros dals uffizis ch’eran sut il medem tetg en in edifizi separà.
Las duas scolettas han ins integrà il 2004 en l’implant da la chasa da scola. L’onn 2007 han ins sanà il tetg da la chasa da scola e fatg ina stanza da scola, nua ch’il plaun sut il tetg è visibel. Il 2013 han ins transfurmà la halla da gimnastica en ina halla polivalenta. Suenter han ins endrizzà là ina scoletta moderna.
CONTACT
Scola da Trin
Christian Erni
Via Principala 76
7014 Trin
scolatrin@scolatrin.ch
079 418 21 72 (direcziun da la scola)
