Ina convivenza buna e che funcziuna en la scola è la basa d’ina atmosfera d’emprender empernaivla. Quella pon ins mo cuntanscher, sche tuts sa tegnan vi da las reglas definidas da la scola.

La basa per in manaschi da scola regulà è d’ina vart l’urden da scola che sa basa sin la lescha da scola e da l’autra vart l’urden disciplinar che regulescha en detagl las prescripziuns surordinadas. L’urden da chasa cumplettescha las reglas da la convivenza. La direcziun strategica da la scola è suttamessa al cussegl da scola. Per la part operativa ed administrativa è la direcziun da la scola responsabla. Tar quai tutgan las fatschentas quotidianas, l’administraziun, la planisaziun dals proxims onns da scola e bler auter. Dasper l’instrucziun è la scola era responsabla per las structuras dal di ed il transport. Quel è reglà uschia ch’ils uffants da Mulin vegnan a scola cun l’auto da posta u cun velo. Tut ils auters uffants vegnan a pe u cun velo. Per il viadi cun la posta survegnan ils uffants in abunament ch’è valaivel l’entir onn e da tut las uras sin il traject definì. L’abunament ston ils uffants adina avair cun els.
La via da scola è en il champ da responsabladad dals geniturs.

Ils basegns per purschidas d’accumpagnament en la vischnanca da Trin vegnan evaluads ed adattads mintg’onn. La purschida per la structura dal di e la maisa da mezdi da la scola da Trin vegnan organisads e tgirads d’ina persuna privata e dal Project en favur dal guaud da muntogna.